Thursday, April 5, 2012

ಹರಾಜು ಮತ್ತು ಇತರ ಕತೆಗಳು

ಥ್ಯಾಂಕ್ಸ್
ಆಟೋ ರಿಕ್ಷಾಚಾಲಕ ಅಂದು ಎಂದಿಗಿಂತ ತುಸು ಬೇಗ ಮನೆಗೆ ಬಂದಿದ್ದ.
ಪತ್ನಿ ಕೇಳಿದ ‘‘ಏನ್ರೀ...ಭಾರೀ ಖುಷಿಯಲ್ಲಿರೋ ಹಾಗಿದೆ. ಏನು ವಿಶೇಷ’’
ಆತ ಹೇಳಿದ ‘‘ಇಂದು ಒಂದು ವಿಚಿತ್ರ ನಡೆಯಿತು ಕಣೆ. ಪ್ರಯಾಣಿಕನೊಬ್ಬ ನನ್ನ ರಿಕ್ಷಾವನ್ನು ಏರಿದ. ಅವನು ಹೇಳಿದ ಸ್ಥಳಕ್ಕೆ ತಲುಪಿಸಿದೆ. ಮೀಟರ್ ನೋಡಿ ಹಣ ಕೊಟ್ಟ ವಿಚಿತ್ರವೆಂದರೆ ಹೋಗುವ ಮೊದಲು ಆತ ನನಗೆ ‘ಥ್ಯಾಂಕ್ಸ್’ ಹೇಳಿದ’’

ಉಪ್ಪು
‘ಕಡಲ ನೀರೇಕೆ ಉಪ್ಪು’
‘‘ನದಿಗಳೆಲ್ಲ ಹೆಣ್ಣಾದ ತಪ್ಪಿಗೆ...ಕಣ್ಣೀರ ರುಚಿಯೇ ಉಪ್ಪು’’

ಹರಾಜು
‘‘ಇಂದು ಲಂಡನ್ನಿನಲ್ಲಿ ಗಾಂಧೀಜಿಯ ವಸ್ತುಗಳ ಹರಾಜು ನಡೆಯುತ್ತದೆಯಂತೆ’’
‘‘ಹೌದಾ? ಹಾಗಾದರೆ ಗುಜರಾತ್‌ನಲ್ಲಿ 2002ರಲ್ಲಿ ನಡೆದದ್ದೇನು?’’

ಊಟ
‘ಇವತ್ತು ಮಧ್ಯಾಹ್ನ ಒಟ್ಟಿಗೆ ಊಟ ಮಾಡೋಣ. ಬರ್ತೀಯ?’ ಗೆಳೆಯ ಕೇಳಿದ.
‘ನಾನು ಇವತ್ತು ತುಸು ಬಿಜಿಯಾಗಿದ್ದೇನೆ. ನಾಳೆ ಮಧ್ಯಾಹ್ನ ಒಟ್ಟಿಗೆ ಕೂರೋಣ’’ ಎಂದೆ.
ಮರುದಿನ ಬೆಳಗ್ಗೆ ಗೆಳೆಯ ಅಪಘಾತದಲ್ಲಿ ಮೃತಪಟ್ಟ ಸುದ್ದಿ.
ಇನ್ನು ನನಗೆ ಮಧ್ಯಾಹ್ನದ ಊಟ ವರ್ಜ್ಯ.

ಅಚ್ಚರಿ
‘‘ರಾಜರಾಯರು ಇಂದು ಸತ್ತರಂತೆ...’’ ಒಬ್ಬ ಹೇಳಿದ.
‘‘ಅರೆ! ಅವರಿನ್ನೂ ಸತ್ತಿರ್ಲಿಲ್ವಾ...?’’ ಇನ್ನೊಬ್ಬ ಅಚ್ಚರಿ ವ್ಯಕ್ತ ಪಡಿಸಿದ.

ಬ್ಯಾಂಕ್
‘‘ಹಾಯ್ ಡಾರ್ಲಿಂಗ್ ಎಲ್ಲಿದ್ದೀಯ?’’ ಗೆಳತಿ ಫೋನಲ್ಲಿ ಕೇಳಿದಳು.
‘‘ನಾನು ಬ್ಯಾಂಕ್‌ನಲ್ಲಿದ್ದೇನೆ...’’ ಆತ ಉತ್ತರಿಸಿದ.
‘‘ಓಹ್ ಡಿಯರ್...ನನಗೆ ಅತ್ಯವಶ್ಯವಾಗಿ ಹತ್ತು ಸಾವಿರ ರೂ. ಬೇಕಾಗಿತ್ತು. ಬರುವಾಗ ಇಡ್ಕೊಂಡು ಬರ್ತೀಯ...’’
‘‘ನಾನು ಬ್ಯಾಂಕ್‌ನಲ್ಲಿದ್ದೀನಿ...ಅಂದ್ರೆ ಬ್ಲಡ್ ಬ್ಯಾಂಕ್‌ನಲ್ಲಿ. ಒಬ್ಬರಿಗೆ ರಕ್ತ ಕೊಡಬೇಕಾಗಿತ್ತು. ಅಂದ ಹಾಗೆ ನಿನ್ನ ಬ್ಲಡ್ ಗ್ರೂಪ್ ಯಾವುದು?’’
ಗೆಳತಿಯ ಫೋನ್‌ನ ರೇಂಜ್ ಕಟ್ಟಾಗಿ ಬಿಟ್ಟಿತು.

2 comments:

  1. ವಿಡಂಬನೆ ಯ ಜೊತೆಗೆ ಸಾಮಾಜಿಕ ಕಳಕಳಿ ಯೂ ಇದೆ....... ಬರೆಯುತ್ತಿರಿ........

    ReplyDelete
  2. olle prayathna ,,,,,,,,,,,,,,,,, all the

    ReplyDelete