Sunday, October 20, 2013

ರಾತ್ರಿ ಕಳ್ಳ ಮನೆಗೆ ನುಗ್ಗಿದ್ದಾನೆ...!

1
ಧರ್ಮ ಪಂಡಿತರ
ಮೇಲೆ ನಂಬಿಕೆ
ಕಳೆದು ಕೊಂಡ ದಿನ
ನಿನ್ನ ಮೇಲಿನ ನಂಬಿಕೆ
ದುಪ್ಪಟ್ಟಾಯಿತು
ನನ್ನ ದೊರೆಯೇ
2
ದೋಚಲು ಬಂದ
ಕಳ್ಳರು ನನ್ನ ನಮಾಝಿನ
ಹರಿದ ಚಾಪೆಯನ್ನು
ನನಗೇ  ಉಳಿಸಿ ಹೋದರು !
ಕೇಳಿದ್ದರೆ ಈ ಚಾಪೆಯನ್ನೂ
ಕೊಟ್ಟು ಬಿಡುತ್ತಿದ್ದೆ 

ನನ್ನ ದೊರೆಯೇ,
ಈ ಚಾಪೆಯನ್ನು ಹೊತ್ತು
ನನ್ನ ಬೆನ್ನು ಗೂನಾಗಿ ಬಿಟ್ಟಿದೆ
3
ಹಣೆಯ ಮೇಲಿರುವ
ನಮಾಜಿನ ಗುರುತು
ನಿಮ್ಮನ್ನು ನನ್ನ ದೊರೆಯ
ಬಳಿ ಒಯ್ಯಲಾರದು
ಧರ್ಮ ಪಂಡಿತರೆ...
ಅವನು ನಿಮ್ಮ ಎದೆಯ ಬಗೆದು
ಗುರುತನ್ನು ಹುದುಕುವನು
4
ನನ್ನ ಸಂಕಟಗಳ
ಒಲೆಯಲ್ಲಿ ನನ್ನ ಅನ್ನ
ಬೇಯುತ್ತಿದೆ
ನನ್ನ ದೊರೆಯೇ,
ಎದೆಯ ಮಡಕೆಯಿಂದ
ಹೊಮ್ಮುವ ಪರಿಮಳಕ್ಕೆ
ನಿನ್ನ ಸ್ವರ್ಗದ ಸ್ವಾದವಿದೆ
5
ಹಿಂಬಾಗಿಲು ಮುರಿದಿದೆ,
ಕಿಟಕಿ ಒಡೆದಿದೆ,
ರಾತ್ರಿ ಕಳ್ಳ ಮನೆಗೆ ನುಗ್ಗಿದ್ದಾನೆ
ನನ್ನ ದೊರೆಯೇ,
ಅವನು ಕದ್ದದ್ದೇನು ಎನ್ನೂದೆ
ನನಗೆ ತಿಳಿಯುತ್ತಿಲ್ಲ

1 comment: