ಗುಜರಿ ಅಂಗಡಿ: ಅರಮನೆಯಂತಹ ಮಸೀದಿ!

Monday, December 2, 2013

ಅರಮನೆಯಂತಹ ಮಸೀದಿ!

1
ಅರಮನೆಯ ಹಂಗು
ಬೇಡವೆಂದು
ಮಸೀದಿಯೆಡೆಗೆ
ನಡೆದೆ ನನ್ನ ದೊರೆಯೇ,
ಆದರೆ ಮಸೀದಿಯ ಪಂಡಿತನೋ
ಅರಮನೆಗೆ ಮುಖ ಮಾಡಿ
ಪ್ರಾರ್ಥನೆ ಸಲ್ಲಿಸುತ್ತಿದ್ದ
2
ಅರಮನೆಯಂತಹ ಮಸೀದಿ!
ಅಮೃತ ಶಿಲೆಯಲ್ಲಿ
ದಾನಿಗಳ ಹೆಸರು ಕೆತ್ತಿದ್ದಾರೆ!
ರಾತ್ರಿ ನನಗೆ ನರಕದ ಕನಸು ಬಿತ್ತು
ನನ್ನ ದೊರೆಯೇ,
ನರಕದ ಬಾಗಿಲಲ್ಲಿ
ಆ ದಾನಿಗಳ ಹೆಸರೂ ಕೆತ್ತಲ್ಪಟ್ಟಿತ್ತು
3
ಅರಮನೆಯಂತಹ
ಮಸೀದಿಗಳ
ಬುಡ ದುರ್ಬಲವಾಗಿರುತ್ತದೆ
ನನ್ನ ದೊರೆಯೇ,
ಯಾವ ದಾನಿಗಳ
ಹಂಗೂ ಇಲ್ಲದ ಬಯಲಲ್ಲಿ
ನಿರ್ಭಯನಾಗಿ ನಿನಗೆ ಬಾಗಿದೆ
4
ಮಸೀದಿಯನ್ನು
ಅಮೃತ ಶಿಲೆಯಲ್ಲಿ
ಬಗೆ ಬಗೆಯಾಗಿ ಅಲಂಕರಿಸಲಾಗಿದೆ
ನನ್ನ ದೊರೆಯೇ,
ಇವರು ನಿನ್ನ ಮರೆತು
ಮಸೀದಿಯನ್ನೇ ಆರಾಧಿಸತೊಡಗಿದ್ದಾರೆ!
5
ನಮಾಜಿಗೆಂದು
ಬಂದವನು ಮಸೀದಿಯ
ವೈಭವಕ್ಕೆ ದಂಗಾಗಿದ್ದಾನೆ!
ನನ್ನ ದೊರೆಯೇ,
ನಾನೋ ಮಸೀದಿಯ ಹೊರಗಿದ್ದೇನೆ
ನಿನ್ನ ವೈಭವಕ್ಕೆ ದಂಗಾಗಿದ್ದೇನೆ!

2 comments:

sunaathDecember 3, 2013 at 10:29 AM
೫ನೆಯ ಹನಿ ಸೂಪರ್!
ReplyDelete
Replies
HarishaDecember 4, 2013 at 11:10 PM
ondondu haniyoo adbhutavaagide Basheer
ReplyDelete
Replies

Add comment

Subscribe to: Post Comments (Atom)

ಬಿತ್ತಿದ ಬೀಜ

ವಾಗ್ವೈಭವ ಅಪಾಯಕಾರಿ. ಅದು ಸಮೂಹವನ್ನು ಉದ್ರೇಕಗೊಳಿಸೋದಕ್ಕಾಗಿ ರೂಪಿತವಾದದ್ದು. ಸುಳ್ಳುಗಳ ಕೇಳಿಸಿಕೊಳ್ಳುತ್ತಾ ಬದುಕೋದು ಸಾಮಾನ್ಯವಾಗಿ ಎಲ್ಲರಿಗೂ ಕ್ಷೇಮವೆನಿಸುತ್ತದೆ. ಹಿತವೆನಿಸುತ್ತದೆ. ಆದರೂ ಜನರ ಆತ್ಮ ಸತ್ಯಕ್ಕಾಗಿ ಹಸಿದಿರುತ್ತದೆ. ಆದ್ದರಿಂದ ನಾವು ನಮ್ಮ ಅತ್ಯಂತ ಏಕಾಂಗಿತನದಲ್ಲಿ ನಾವೇ ನಂಬಿದ್ದನ್ನು ಹೇಳುವ ಧೈರ್ಯ ಮಾಡಬೇಕು.
-ಡಾ. ಯು. ಆರ್. ಅನಂತಮೂರ್ತಿ

ಋಣಿ

ಇಲ್ಲಿರುವ ನನ್ನ ಬರಹಗಳಿಗೆ ಪೂರಕವಾಗಿ ಬಳಸಿಕೊಂಡಿರುವ ಯಾವುದೇ ಪೇಂಟಿಂಗ್, ಚಿತ್ರ, ಫೋಟೋ ನನ್ನವಲ್ಲ. ಗೂಗಲ್ ಸರ್ಚ್ ಮೂಲಕ ಅಥವಾ ಬೇರೆ ಬೇರೆ ವೆಬ್ ಸೈಟ್ ಗಳಿಂದ ಎರವಲು ಪಡೆದಿರೋದು. ಈ ಚಿತ್ರಗಳು ನನ್ನ ಬರಹಗಳ ತೂಕವನ್ನು ಹೆಚ್ಚಿಸಿವೆ. ಅದಕ್ಕಾಗಿ ಆ ಅನಾಮಿಕ ಕಲಾವಿದರಿಗೆ ಚಿರ ಋಣಿಯಾಗಿದ್ದೇನೆ.