ಒಂದು ಪುಟ್ಟ ಗುಡಿಸಲಲ್ಲಿ ದಂಪತಿ.
ಅವರಿಗೆ ಮಕ್ಕಳಿರಲಿಲ್ಲ. ಒಂದು ಆಡನನ್ನು ಸಾಕುತ್ತಿದ್ದರು.
ಹಬ್ಬ ಬಂತು. ಬಡವರು. ಉಣ್ಣುವುದಕ್ಕೆ ಅನ್ನವಿಲ್ಲ.
ಯಾರೋ ಬಂದು ಕೇಳಿದರು ‘‘ನಿನ್ನ ಆಡನ್ನು ಕೊಡು...ಮೂರು ಸಾವಿರ ರೂ. ಕೊಡುತ್ತೇವೆ....’’
ದಂಪತಿ ಆಡನ್ನೇನೋ ಮಾರಿದರು.
ಆದರೆ ಹಬ್ಬವನ್ನು ಆಚರಿಸಲಾಗದೆ ಇಡೀ ದಿನ ದುಃಖದಲ್ಲಿ ಕಳೆದರು.
ಸಂಬಂಧ
ಅವನೊಬ್ಬ ಅನಾಥ. ದಿಕ್ಕಿಲ್ಲದವನು. ಸತ್ತು ಹೋದ.
ಯಾರೋ ಹೇಳಿದರು ‘‘ಅವನ ಗೋಣಿಚೀಲದ ತುಂಬಾ ದುಡ್ಡಿದೆ’’
ಅದ ಕೇಳಿದ್ದೇ...ನೂರಾರು ಜನ ಬಂದರು. ಸಂಬಂಧಗಳು ಕೂಡಿಕೊಂಡವು.
ಎಲ್ಲರೂ ಹೆಣಕ್ಕೆ ಹೆಗಲು ಕೊಟ್ಟರು. ಸಂಸ್ಕಾರ ಮುಗಿದದ್ದೇ ಗೋಣಿ ಚೀಲಕ್ಕಾಗಿ ಬಡಿದಾಟವಾಯಿತು.
ನೋಡಿದರೆ...
ಚೀಲದೊಳಗೆ ಹರಿದ ಚಿಂದಿ ಮಾತ್ರ ಇತ್ತು.
ವದಂತಿ ಹಬ್ಬಿಸಿದಾತ ಮರೆಯಲ್ಲಿ ನಿಂತು ಕಿಸಕ್ಕನೆ ನಕ್ಕ.
ಕನ್ನಡಿ
ತಲೆಯಲ್ಲಿ ಒಂದು ಕೂದಲು ಹಣ್ಣಾಗಿತ್ತು.
ಕಳೆದ ಒಂದು ವಾರದಿಂದ ಅದನ್ನು ಕಿತ್ತು ಹಾಕಲು ಪ್ರಯತ್ನಿಸುತ್ತಿದ್ದೆ.
ಕಪ್ಪು ಕೂದಲುಗಳ ನಡುವೆ ಅದು ಜಾರಿಕೊಳ್ಳುತ್ತಿತ್ತು. ಬಚ್ಚಿಟ್ಟುಕೊಳ್ಳುತ್ತಿತ್ತು.
ಎಳೆದರೂ ಇನ್ನಾವುದೋ ಕಪ್ಪು ಕೂದಲು ಕಿತ್ತು ಬರುತ್ತಿತ್ತು.
ನಿನ್ನೆ ರಾತ್ರಿ ಅದು ಹೇಗೋ ಕನ್ನಡಿಯ ಮುಂದೆ ಈ ಬಿಳಿ ಕೂದಲು ನನ್ನ ಕೈಗೆ ಸಿಕ್ಕು ಬಿಟ್ಟಿತು. ಎಳೆದೇ ಬಿಟ್ಟೆ. ಆ ಹಣ್ಣು ಕೂದಲು ಕೊನೆಗೂ ನನ್ನ ಕೈ ಸೇರಿತು.
ಮರುದಿನ ಜಂಬದಿಂದ ಕನ್ನಡಿ ನೋಡಿದರೆ ನಾಲ್ಕು ಬಿಳಿ ಕೂದಲು ನನ್ನ ನೋಡಿ ನಗುತ್ತಿತ್ತು.
ಒಂದು ನಿಮಿಷ
ಗಲ್ಲು ವಿಧಿಸುವ ಕಟುಕನನ್ನು ಯಾರೋ ಕೇಳಿದರು ‘‘ಬರೇ ಒಂದು ನಿಮಿಷದ ಸಾಯಿಸುವ ಕೆಲಸಕ್ಕೆ ನಿನಗೆ ಎರಡು ಸಾವಿರ ರೂಪಾಯಿ ಕೊಡ್ತಾರಾ?’’
‘‘ಸಾಯಿಸುವ ಕೆಲಸಕ್ಕಲ್ಲಪ್ಪ...ಆ ಒಂದು ನಿಮಿಷ ನಾನೂ ಅವನೊಂದಿಗೆ ಸಾಯಬೇಕಲ್ಲ...ಅದಕ್ಕೆ ಅವರು ಕೊಡುವ ಹಣ ಅದು...’’
ಅಚ್ಚರಿ
ಹಳ್ಳಿಯ ಹುಡುಗ ನಗರದ ತನ್ನ ಬಂಧುಗಳ ಮನೆಗೆ ಹೋಗಿದ್ದ.
ನಗರದ ಹುಡುಗ ಅಚ್ಚರಿಯಿಂದ ಕೇಳಿದ ‘‘ನಿಮ್ಮ ಊರಿನಲ್ಲಿ ನದಿಯಿದೆಯಂತೆ ಹೌದಾ?’’
ಹಳ್ಳಿ ಹುಡುಗ ಅಷ್ಟೇ ಅಚ್ಚರಿಯಿಂದ ಪ್ರಶ್ನಿಸಿದ ‘‘ಹೌದು. ಅದರಲ್ಲೇನು ವಿಶೇಷ?’’
ಸಂಕಟ
ಗಲ್ಲು ವಿಧಿಸುವ ಕಟುಕನನ್ನು ಹುಡುಗನೊಬ್ಬ ಕೇಳಿದ ‘‘ಸಾಯುವವನ ಒದ್ದಾಟ ನೋಡುವುದಕ್ಕೆ ತುಂಬಾ ಸಂಕಟವಾಗಿರುವುದಿಲ್ವೆ?’’
ಕಟುಕ ಹೇಳಿದ ‘‘ಸಾಯಿಸುವವನ ಒದ್ದಾಟ ಅದಕ್ಕಿಂತಲೂ ಸಂಕಟವಾಗಿರುತ್ತದಪ್ಪಾ’’
ella kathegalu chennaagive, heege kathe baredukomdu iddubidabaarade neevu, dharmagala bagge maatanaadade?
ReplyDelete