ಕಾಗೆ ಮರಿಯ ಹಾಡು

 ನಾನೊಂದು
ಪುಟ್ಟ ಕಾಗೆ ಮರಿ

ಹಾರಿ ಹೋದ
ಅಮ್ಮ ಕಾಗೆಗಾಗಿ
ಕಾಯುತ್ತಿದ್ದೇನೆ

ನನ್ನಮ್ಮನ ಬಾಯಿಂದ
ರೊಟ್ಟಿ ಕಸಿದ
ನರಿಯ ಕತೆಯನ್ನು
ಓದುತ್ತಾ ಅಮ್ಮ
ಹೋದ ದಾರಿ ಕಾಯುತ್ತಿದ್ದೇನೆ
ಅಮ್ಮ ಕಾಗೆ ತರುವ
ತುಂಡು ರೊಟ್ಟಿಗಾಗಿ

ಜಾಣ ನರಿ
ನನ್ನ ತರಗತಿಗೆ ಪಾಠ
ಅದು ನನ್ನ ಪರಂಪರೆ
ನನ್ನ ಅಮ್ಮನ
ಬಣ್ಣ ಎಷ್ಟು ಚಂದ?
ಧ್ವನಿ ಎಷ್ಟು ಚಂದ ?
ಎಂದು ವಂಚಿಸಿದ ನರಿ
ಜಾಣ
ನಾವೆಲ್ಲರೂ ಜಾಣರಾಗಬೇಕು
ಕಾಗೆಯಂತೆ
ದಡ್ದರಾಗಬಾರದು
ಇದು ನನಗೆ ಪಾಠ
ನಾನಿದನ್ನು ಕಲಿತು
ಪರೀಕ್ಷೆ ಬರೆದು
ಜಾಣನಾಗಬೇಕು

ಆದರೂ ನನ್ನ ಅಮ್ಮನ ಬಣ್ಣ
ನನಗೆ ಎಷ್ಟು ಚಂದ!
ನನ್ನ ಅಮ್ಮನ
ಧ್ವನಿ ಎಷ್ಟು ಚಂದ!!

ನಾನೊಂದು
ಪುಟ್ಟ ಕಾಗೆ ಮರಿ

ಹಾರಿ ಹೋದ
ಅಮ್ಮನಿಗಾಗಿ
ಕಾಯುತ್ತಿದ್ದೇನೆ