Saturday, March 23, 2013

ಮನೆ ಸೇರೂದೆಂದರೆ....

 ಎರಡೆರಡು ಮೆಟ್ಟಿಲುಗಳ ಹಾರಿ ಏರಿ
ಮನೆ ಸೇರುವ ತವಕದಲ್ಲಿದ್ದ
ಕಂದನಿಗೆ ಹೇಳಿದೆ....
ಮಗು, ಒಂದೊಂದೇ ಹೆಜ್ಜೆ ಇಡು
ಪ್ರತಿ ಮೆಟ್ಟಿಲಿಗೂ ನಿನ್ನ ಪುಟ್ಟ
ಪಾದದ ಸ್ಪರ್ಶ ಭಾಗ್ಯ ಸಿಗಲಿ...

ಮಗು, ಒಂದೊಂದೇ ಹೆಜ್ಜೆ ಇಟ್ಟು
ಮೇಲೇರು...ಪ್ರತಿ ಮೆಟ್ಟಿಲ
ಪರಿಚಯ ನಿನ್ನ
ಪುಟ್ಟ ಪಾದಕ್ಕೆ ಸಿಗಲಿ...

ಬೀಳುವ ದಿನಗಳಲ್ಲಿ
ಯಾವ ಮೆಟ್ಟಿಲೂ ನಿನಗೆ
ಮುಖ ತಿರುಗಿಸದಿರಲಿ...
ತಾಯ ಮಡಿಲಂತೆ
ನಿನ್ನ ಎತ್ತಿ ಕೊಳಲಿ

ಮನೆ ತಲುಪೂದೆಂದರೆ
ಪ್ರತಿ ಮೆಟ್ಟಿಲಲ್ಲೂ ನಿನ್ನ ಹೆಜ್ಜೆಗಳನ್ನು
ಛಾಪಿಸೂದು
ಮಗುವೆ...  

ನೀನು ಮನೆ ತಲುಪಿದ್ದಕ್ಕೆ
ಅವೆಲ್ಲ ಒಂದು ದಿನ
ಸಾಕ್ಷಿ ನುಡಿಯೂದು....

1 comment: