ಹೆಬ್ಬೆರಳು

ಅದೇನೋ ಮಾಡಲು ಹೋಗಿ
ನನ್ನ ಹೆಬ್ಬೆರಳು ಗಾಯಗೊಂಡಿತ್ತು
ನೆತ್ತರು ಒಸರೂದು ಬೇಡವೆಂದು
ಬಟ್ಟೆ ಸುತ್ತಿಕೊಳ್ಳುತ್ತಿರುವಾಗ
ಯಾರೋ ಕರೆದಂತಾಯಿತು
"ಏನೋ ಏಕಲವ್ಯ?"
ತಲೆ ಎತ್ತಿ ನೋಡಿದರೆ
ನನ್ನ ಗುರುಗಳು ನಗುತ್ತಿದ್ದರು

"ನಾನಂತೂ ಕೇಳಿಲ್ಲ ಗುರುಕಾಣಿಕೆ,
ಹೇಳು
ಯಾರಿಗೆ ಕೊಟ್ಟೆ ನಿನ್ನ
ಹೆಬ್ಬೆರಳು ?''

ನಕ್ಕು ಬಾಗಿದೆ...
"ಕಲಿಸು  ಎಂದು ನಾನು
ಅವನಲ್ಲಿ ಕೇಳಲಿಲ್ಲ,
ಕಲಿಸಿದ...
ನಾನು ಕೊಡಲಾರೆ
ಎಂದು ಹೇಳುವ ಮೊದಲೇ
ಕತ್ತರಿಸಿಕೊಂಡ
ನನ್ನ ಹೆಬ್ಬೆರಳ ಗುರುಗಳೇ''

ಗುರುಗಳು ಮೆದುವಾದರು
"ಎಲ್ಲಿರುವನು ಅವನು?,
ಗುರು ಕುಲಕ್ಕೆ  ಕಳಂಕ ತಂದವನು''
"ನಾನು ನೋಡಿಲ್ಲ ಗುರುವೇ
ಈ ವರೆಗೆ ಅವನನ್ನು''
ಎಂದು ಮೌನಕ್ಕೆ ಶರಣಾದೆ

ಗುರುಗಳು ನನ್ನ ಮುಂದೆ
ತಮ್ಮ ಅಂಗೈಯನ್ನೂ ಚಾಚಿದರು
ನನಗೆ ಗೊತ್ತೇ ಇಲ್ಲದ ಸಂಗತಿ
'ಅವರಿಗೂ ಹೆಬ್ಬೆರಳು ಇದ್ದಿರಲಿಲ್ಲ'

"ಸಮಯ ಕೆಟ್ಟ ಗುರು.
ಮೊದಲು ದಕ್ಷಿಣೆ
ಕಿತ್ತುಕೊಂಡು,
ಬಳಿಕ  ಪಾಠ ಕಲಿಸುತ್ತಾನೆ''
ಎನ್ನುತ್ತಾ ಗುರುಗಳು
ನನ್ನ ತಲೆ ಸವರಿ
ನಡೆದು ಹೋದರು...

ಬಟ್ಟೆ ಸುತ್ತಿದ್ದರೂ
ನನ್ನ ಹೆಬ್ಬೆರಳಿಂದ
ರಕ್ತ ಒಸರೂದು ನಿಂತಿರಲಿಲ್ಲ